عزمِ ترکِ آرزو اندیشۂ باطل سہی
دل مگر اس بات پر مائل نہیں، قائل سہی
پوچھتے ہیں وہ کہ کیسے ہنس کے ہر مشکل سہی
میں یہ کہتا ہوں حسابِ دوستاں در دل سہی
دیکھنا یہ ہے کہ دل ہے بھی، کسی قابل سہی
ہر ادا اس کی نگاہِ ناز بھی قاتل سہی
ازرہِ لطف و کرم، اے میرِ بزمِ کائنات
خلوتِ جاں میں بھی اک ہنگامۂ محفل سہی
موت نے آکر جو پیغامِ حیات ِ نو دیا
ہوگئی مشکل مری آساں، بصد مشکل سہی
اب ترے غم میں کوئی میرا شریکِ غم نہ ہو
تیرے غم میں ہیں تو دنیا بھر کے غم شامل سہی
اہتمامِ بزمِ جاناں میں چراغوں کی طرح
ہم بھی شامل تھے برائے نام ہی شامل سہی
ہے غمِ راہِ طلب ہی منزلِ راہِ طلب
رہروِ کامل ہوں میں، گم کردۂ منزل ہی سہی
دیکھیے کیا بے نیازِ خواہشاتِ دل ہوں میں
آشنائے دل سہی، رمز آشنائے دل سہی
تھی اُدھر قاتل کی بھی چشمِ پشیماں دیدنی
اسِ طرف تھا رقصِ بسمل، دید کے قابل سہی
ہے تو اخگرؔ ایک خلوت ہی خود اپنی ذات میں
اب جو تم کہہ دو کہ محفل ہے تو پھر محفل سہی
٭
No comments:
Post a Comment