اوّل اوّل جو تھا پلکوں پہ چراغاں ہے وہی

سوچ اس کی مرا اندازِ تکلّم اخگرؔ

اس کے جو دل میں ہے، لب پر مرے عنواں ہے وہی

اوّل اوّل جو تھا پلکوں پہ چراغاں ہے وہی

دل میں پھر شوق پئے خاطرِ مژگاں ہے وہی

حاصلِ بزمِ چراغاں پئے رنداں ہے وہی

“ساغر مے کہ بس اک شمعِ شبستاں ہے وہی”

دردِ محکم ہے وہی درد جو حد سے نہ بڑھے

اور جب حد سے گزر جائے تو درماں ہے وہی

شرحِ غم دیدۂ خوں بار سے اب ہو کہ نہ ہو

دل میں لیکن خلشِ ناوکِ جاناں ہے وہی

اب تو رونے سے بھی ہوتی نہیں تسکین مگر

دل پہ یلغارِ ہجومِ غم و حرماں ہے وہی

وائے نادانیِ قاتل کہ مرے قتل کے بعد

سخت حیران و پریشان و پشیماں ہے وہی

جانے کیوں اس بُتِ کافر ہی سے واعظ نے کہا

ساری دنیا میں فقط ایک مسلماں ہے وہی

حسرتِ وصل تو مُدّت سے نہیں ہے لیکن

لذّتِ شدّتِ بیتابیِ ہجراں ہے وہی

سوچ اس کی مرا اندازِ تکلّم اخگرؔ

اس کے جو دل میں ہے، لب پر مرے عنواں ہے وہی

٭