اپنی حیرت کا سماں تجھ کو دکھا بھی نہ سکوں

اپنی حیرت کا سماں تجھ کو دکھا بھی نہ سکوں

آئینہ ہوں کہ میں چاہوں تو چھُپا بھی نہ سکوں

یہ طلب کوئی طلب ہے کہ رہِ اُلفت میں

میں تُجھے ڈھونڈ لوں، اور خود کو گنوا بھی نہ سکوں

لاکھ سرگرم ہو وہ برقِ تجلّی، لیکن

دل کوئی طُور نہیں ہے کہ بچا بھی نہ سکوں

پاسِ خاطر مُجھے پھولوں کا بہت ہے یعنی

شاخِ گُل سامنے آئے تو جھُکا بھی نہ سکوں

محفلِ ناز سے جاتا ہوں میں لیکن اخگرؔ

کوئی پابند نہیں ہوں کہ پھر آ بھی نہ سکوں

٭