خُوگرِ غم ہے جو دل غم سے ہراساں کیوں ہو

خُوگرِ غم ہے جو دل غم سے ہراساں کیوں ہو

میری صورت سے عیاں حالِ پریشاں کیوں ہو

تیری تسکین ہو لیکن دلِ ناداں کیوں ہو

طبعِ نازک پہ گراں شوقِ فراواں کیوں ہو

موت ہے چارۂ دردِ غمِ ہجراں لیکن

اس قدر چارہ گریِّ غمِ ہجراں کیوں ہو

صبح ہونے کا گُماں ہے نہ کوئی شمعِ اُمّید

پھر بھلا کوئی شریکِ شبِ ہجراں کیوں ہو

نغمۂ شوقِ فراواں ہے نہ وہ سوز و گداز

مُرتعش کیا ہو کوئی تارِ رگِ جاں کیوں ہو

اب نہ پھولوں کی وہ بہتات نہ گُل چیں کی کمی

پھر مجھے شکوۂ کوتاہیِ داماں کیوں ہو

اب وہ کربِ شبِ ہجراں ہی نہیں ہے اخگرؔ

میری پلکوں پہ کوئی اشک فروزاں کیوں ہو

٭