عاشق فرازِ دار و رسن ہی پہ رہ گئے
ہم بے خودی میں کُوچۂ جاناں تک آگئے
اتمامِ ضبطِ سوزشِ پنہاں تک آگئے
دل سے کئی چراغ جو مژگاں تک آگئے
دشتِ بلا سے بزمِ چراغاں تک آگئے
ہم گھر سے اٹھ کے محفلِ خوباں تک آگئے
اک زحمتِ نگاہ تو فرمائیے کہ ہم
آئینہ بن کے عالمِ حیراں تک آگئے
پہلے تو دل میں اس کے سوا کوئی بھی نہ تھا
پھر بے شمار دشمنِ ایماں تک آگئے
بادِ صبا پیامِ خزاں دے رہی ہے کیوں
کیا ہم ہجومِ رنگِ بہاراں تک آگئے
عاشق فرازِ دار و رسن ہی پہ رہ گئے
ہم بے خودی میں کُوچۂ جاناں تک آگئے
اب کے وطن میں آئے تو ایسا لگا ہمیں
گویا جوارِ گورِ غریباں تک آگئے
وہ غلبۂ جنوں ہے کہ اب کی بہار میں
دامن کے تار چاکِ گریباں تک آگئے
اخگرؔ وبالِ جادۂ جاں سے گُزر گئے
یعنی بخیر منزلِ جاناں تک آگئے
٭
No comments:
Post a Comment