اسی طرح شبِ ظلمت میں جی کوبہلاؤ
طلوعِ مہر و نَمودِ سحر کی بات کرو
کسی دوا نہ کسی چارہ گر کی بات کرو
وفورِ لذّتِ زخمِ جگر کی بات کرو
عروجِ فکر و شعور نظر کی بات کرو
سخنورانِ زماں کچھ ہُنر کی بات کرو
ہمیں مدارجِ کسبِ ہُنر سے کیا مطلب
ستایشِ ہُنر ِ بے ہُنر کی بات کرو
فرازِ عزم پہ فائز ہے جراَتِ پرواز
اب آب و دانہ نہیں، بال و پر کی بات کرو
کسی کی پہلی نظر کی مثال مشکل ہے
ہزار شوخیِ برق و شرر کی بات کرو
اسی طرح شبِ ظلمت میں جی کوبہلاؤ
طلوعِ مہر و نَمودِ سحر کی بات کرو
ہم ایسے رند کی مٹّی کا ظرف بھی دیکھو
اگر کمالِ کفِ کوُزہ گر کی بات کرو
حدیث وحشتِ صحرا جنوں فزا ہی نہیں
مرے مکان کے دیوار و در کی بات کرو
غُبارِ کُوچۂ جاناں رچا ہے آنکھوں میں
نگاہِ شوق سے کحل البصر کی بات کرو
ابھی چراغِ اُمّیدِ سحر بُجھا تو نہیں
تُم اس کی لَو سے شبِ مُختصر کی بات کرو
جب اُس کا عیب ہی اُس کا کمال ہے اخگرؔ
تو راہزن سے بھی کیا راہبر کی بات کرو
٭
No comments:
Post a Comment