عشق میں شعلگی نہ تھی، حسن میں دلبری نہ تھی .. ۔ منقبت، خیاباں

عشق میں شعلگی نہ تھی، حسن میں دلبری نہ تھی

قبل ولادتِ حسین راہ تھِی رہبری نہ تھی

کسبِ ہُنر سے شاعری مانا کبھی بَری نہ تھی

منزلِ منقبت، مگر دادِ سُخنوری نہ تھی

مانا کہ ہار ماننا، سُنّتِ حیدری نہ تھی

جنگ پئے نمایشِ طاقتِ لشکری نہ تھی

“شاخِ نہالِ آرزو ایسی کبھی ہر ی نہ تھی”

اور مِثالِ برگِ دل، سرخ کوئی پری نہ تھی

مژدۂ آفرینشِ سبطِ نبی سے کھل اُٹھا

ورنہ صبا سے غنچۂ دل کو خوشی ذری نہ تھی

آلِ نبی کا فقر بھی رشکِ تمام فخر تھا

شوکتِ خسروی سے کم شانِ قلندری نہ تھی

غیرتِ دیں تو مُقتضیٰٔ ختمِ یزیدیت کی تھی

پیشِ نظر حُسین کے اپنی سکندری نہ تھی

اس میں تو بس کے رہ گئی خوشبوئے نعرۂ علی

ورنہ فضائے کربلا، ایسی معنبری نہ تھی

اُٹھی خلافِ ظلم بھی، وہ بِکمالِ صبر و ضبط

منزلِ تیغِ حیدری، شانِ سپہ گری نہ تھی

صورتِ اخگرؔ انا مشعلِ فکرِ منقبت

صرفِ نیازِ رونقِ زہرہ و مشتری نہ تھی

٭