یہ پردہ دارِ محبّت ہیں آپ کی آنکھیں
کہ رشکِ جام ہیں موجِ مئے رواں کے لیے
جمالِ یار ہے تنویرِ دو جہاں کے لیے
خیالِ یار ہمارے سکونِ جاں کے لیے
یہ اک شُگُون مبارک ہے اس گماں کے لیے
کہ دل میں ہُوک سی اٹھی ہے آشیاں کےلیے
چمن کی یاد نے ہم کو کیا ہے آمادہ
قفس میں جراَتِ تعمیرِ آشیاں کے لیے
خلوص و جہدِ مسلسل توکّل و اُمّید
“یہی ہے رختِ سفر اہلِ کارواں کے لیے”
غمِ جہاں، غمِ جاناں، غمِ فراق و وصال
ہزار غم ہیں مری جانِ ناتواں کے لیے
مثالِ ساغر و مینا ہیں اپنے دیدہ و دل
غمِ حیات کی صہبائے ارغواں کے لیے
خدا گواہ یقیناً اٹھارہے ہیں ہم
قفس کا عیشِ اذیّت بھی آشیاں کے لیے
میں اک مٹا ہوا حرفِ غلط سہی لیکن
مری تلاش بھی ہے زیبِ داستاں کے لیے
یہ پردہ دارِ محبّت ہیں آپ کی آنکھیں
کہ رشکِ جام ہیں موجِ مئے رواں کے لیے
تلاشِ نقشِ کفِ پائے یار ہے اخگرؔ
نگاہ و دل نہیں بے تاب کہکشاں کے لیے
٭
No comments:
Post a Comment