لَو مِرے دل کی اُن آنکھوں میں کہاں سے آئی
بات اشاروں کی تھی، لفظوں میں کہاں سے آئی
دِل کے زخموں کو کوئی ٹھیس لگی ہے شاید
پھر یہ سُرخی مِرے اشکوں میں کہاں سے آئی
اب وہ خود پوچھنے آئے ہیں، مِرے دل کا مزاج
یہ روش زُہرَہ جبینوں میں کہاں سے آئی
شامِ غم تھا تیری زُلفوں کا تصوّر پیہم
نیند آخر مِری آنکھوں میں کہاں سے آئی
خلوتِ جاں میں کوئی آکے چھُپا ہے ورنہ
روشنی دل کے دریچوں میں کہاں سے آئی
پوچھتی رہتی ہے جو قیصرو کِسریٰ کے مزاج
شان یہ خاک نشینوں میں کہاں سے آئی
پُرسِشِ حال پہ حیرت ہے مُجھے اے اخگرؔ
یہ مُروّت مِرے اپنوں میں کہاں سے آئی
٭
No comments:
Post a Comment