کچھ اس طرح آزمانے لگے

تری نگاہ کچھ اس طرح آزمانے لگے

کہ درد بڑھ کے مِرا حوصلہ بڑھانے لگے

تیری نگاہ خود اپنی جگہ ہے خاکِ شفا

اگر نہیں تو مِری خاک ہی ٹھکانے لگے

نگاہِ جلوہ طلب کا بھرم نہ کھُل جائے

وہ بے نقاب کہیں سامنے نہ آنے لگے

یہ آرزو تھی کہ اِک لمحہ تجھ سے بات کریں

اس انتظار میں ہم کو کئی زمانے لگے

قفس کا عیشِ اذّیت اٹھائے کون بھَلا

اگر ہوائے چمن سب کو راس آنے لگے

خیالِ کُوچہء جاناں جو ایک بار آیا

تو بار بار قدم اپنے ڈگمگانے لگے

تلاشِ زیست میں ہم منزلِ حیات سے بھی

گزر گئے ،چلو اچھا ہوا ٹھکانے لگے

اگر وہ زلف کو شانوں پہ اپنے بکھرادیں

تو رات کیا ہے ستاروں کو نیند آنے لگے

جو بزمِ ناز سے اُٹھّے تو اس طرح اخگرؔ

غبار جیسے سرِ دشت اُڑ کے جانے لگے

٭