چھُپا بھی نہ سکوں

دل ہے وہ زخمِ تمنّا کہ دکھا بھی نہ سکوں

اور چاہوں جو چھُپانا تو چھُپا بھی نہ سکوں

اپنی حیرت کا سماں تُجھ کو دکھا بھی نہ سکوں

آئنہ بن کے تِرے سامنے آبھی نہ سکوں

میرے ہونٹوں کے تبسّم پہ نہ جائے دنیا

اب وہ کیفیتِ غم ہے کہ چھُپا بھی نہ سکوں

بوالہوس ہوتے ہیں کتنے یہ زمانے والے

میں تو جی بھر کے تِرے ناز اُٹھا بھی نہ سکوں

وہ سِتارے غم ِحالات نے بخشے ہیں مُجھے

جن ستاروں کو میں پلکوں پہ سجا بھی نہ سکوں

شدّتِ شوق حدِ شوق سے آگے ہے بہت

اب تمنّا کو میں آنکھوں میں چُھپا بھی نہ سکوں

لوگ ہرآن بدل لیتے ہیں چہرے اخگرؔ

آئنہ چاہوں دکھانا تو دکھا بھی نہ سکوں

٭