اشک خود ہی ٹپک گئے

یہ بجا کہ پُرسِشِ حال پر مِرے اشک خود ہی ٹپک گئے

مِرے چارہ گر مِرا بس نہ تھا کہ بھرے تھے جام چھلک گئے

وہ ہجومِ جلوۂ و رنگ تھا کہ ملا کسی کو نہ راستہ

یہ ہمیں تھے جو تجھے دیکھنے تِری بزمِ ناز تلک گئے

چلے ہر طرف پھِرے کُو بہ کُو تِری جُستجو تھی وہ جُستجو

کہ ہم اہلِ درد کا ذکر کیا، کئی خضرِ راہ بھٹک گئے

تھا عجیب عالمِ جُستجو، تھی عجیب منزلِ آرزو

وہ مِلا قریب رگِ گلو جسے ڈھونڈ ڈھونڈ کے تھک گئے

مجھے آستاں تِرا مل گیا، مِرا عجز تھا مرا راہنما

جنہیں عاشقی کا غرور تھا، وہ تری گلی میں بھٹک گئے

مِری آرزو کی پُکار تھی، کہ ہوائے موجِ بہار تھی

وہ نظر جو دل کی طرف اُٹھی، تو ہزار درد مہک گئے

مجھے کوئی ناز جبیں نہیں، فقط اخگرؔ اس پہ غُرور ہے

کہ مری جبیں کے جمال سے تِرے نقشِ پا بھی چمک گئے

٭