گویائی کہاں ہے

لبوں کو تابِ گویائی کہاں ہے

مُحبّْت ہی محبّت کی زُباں ہے

یہ کس معراج پر دردِ نہاں ہے

لبوں کی مُسکراہٹ بھی فغاں ہے

مِرا غم ہے عیاں، بالکل عیاں ہے

خموشی بھی اِک اندازِ بیاں ہے

یہ دل پتّھر سمجھتے ہیں جسے آپ

یہ پھولوں سے بھی قیمت میں گراں ہے

فضاؤں میں یہ کس نے سانس لی ہے

مہک سی گُلستاں در گُلستاں ہے

!مِرا خاموش چہرہ تکنے والو

تُمہیں اندازۂ طوفاں کہاں ہے

!مُحبّت میں شُمار یکِ نفس بھی

مُسلسل زندگی کا امتحاں ہے

ہیں ایسے لوگ بھی گُلشن میں جن پر

کلی کا اِک تبسّم بھی گراں ہے

میں اخگرؔ دوجہاں کو بھُول جاتا

مگر اُن کی محبّت درمیاں ہے

٭