وفا دینے لگے

جب وہ ظالم خود مجھے دادِ وفا دینے لگے

کیوں نہ اندازِ ستم اس کا مزا دینے لگے

وار اُسی نسبت سے دل پر اور کچھ گہرے ہوئے

لوگ جتنی دستِ قاتل کو دُعا دینے لگے

ہو کچھ اس انداز سے چارہ گری اے چارہ گر

ہر تبسّم دل کے زخموں کا پتا دینے لگے

ہر قدم پر دیکھ کر سرگرمیء پائے طلب

راہ کے کانٹے بھی ہم کو راستہ دینے لگے

!زخمِ تازہ کی طلب تھی مل گیا مرہم ہمِیں

ہم نے کیا مانگا تھا ہم کو آپ کیا دینے لگے

بُوئے گل کا پیرہن ہے برگِ گُل تو کیا عجب

اپنا دامن بھی تِری بُوئے قبا دینے لگے

جتنی اُمّیدوں کی شمعیں تھیں وہ اخگرؔ بُجھ گئیں

یوُں مجھے وہ اپنے دامن کی ہوا دینے لگے

٭