ستم ہے مگر ایسا بھی نہیں ہے

شایانِ ستم ہے مگر ایسا بھی نہیں ہے

دل مائلِ غم ہے مگر ایسا بھی نہیں ہے

کیوں پُرسِشِ احوال پہ آنکھیں نہ بھرآئیں

کچھ درد تو کم ہے، مگر ایسا بھی نہیں ہے

درکار ہیں کچھ اور ابھی اشکِ ندامت

دامن مِرا نم ہے، مگر ایسا بھی نہیں ہے

حالات مِرے سُن کے پگھل سکتا ہے وہ بھی

پتھّر کا صنم ہے مگر ایسا بھی نہیں ہے

کھُل جائے تِرا بندِ قبا تارِ نظر سے

آنکھوں میں تو دم ہے، مگر ایسا بھی نہیں ہے

تسلیم کہ وہ دُشمنِ جاں ہی سہی اخگرؔ

مائل بہ کرم ہے مگر ایسا بھی نہیں ہے

٭