فصلِ بہاراں نئے نئے

لائی ہے رنگ فصلِ بہاراں نئے نئے

ہوتے ہیں چاک روز گریباں نئے نئے

وعدے نئے نئے، کبھی پیماں نئے نئے

پیدا ہوئے ہیں دُشمنِ ایماں نئے نئے

جب بھی اُٹھا کے سر کو چلا کوئی راہرو

نکلے امیرِ شہر کے فرماں نئے نئے

ہم سے نہ پُوچھیے شبِ ہجراں کے واقعات

ہم ہیں اسیرِ زُلفِ پریشاں نئے نئے

یارب جمالِ فکر و متاعِ سُخن کی خیر

ہر روز دیکھتا ہوں، غزل خواں نئے نئے

تبدیلیء مذاقِ جنوں کُچھ نہ پوچھیے

دامن نئے نئے ہیں، گریباں نئے نئے

!عنوان بن نہ جائیں کسی تازہ زخم کا

دل میں مچل رہے ہیں جو ارماں نئے نئے

اخگرؔ کچھ اور وسعتِ احساس چاہیے

اس دَور میں غزل کے ہیں امکاں نئے نئے

٭