محور لگا مجھے

جب دل خیالِ یار کا محور لگا مُجھے

ہر لمحۂ حیات مُنوّر لگا مجھے

اپنی بُلندیوں سے جو کمتر لگا مُجھے

وہ قد میں آسماں کے برابر لگا مُجھے

اللہ رے تلاطُمِ احساسِ تشنگی

جو بھی سَراب تھا، وہ سمندر لگا مُجھے

آنکھوں سے بہہ گیا جو وہ اِک سیلِ اشک تھا

جو دل میں رہ گیا، وہ سمندر لگا مُجھے

جس سے ملی دلوں کے اندھیروں کو روشنی

ساغر وہ آفتاب سے بہتر لگا مُجھے

لا حاصلی کے گرد اُمّیدوں کا دائرہ

بیوہ کی چُوڑیوں کا مُقدّر لگا مُجھے

مَنسُوب جس کی خاک سے تھیں خاکساریاں

اس راہ کا فقیر بھی افسر لگا مُجھے

کتنا جنُوں نواز تھا ماحولِ کُوئے یار

اخگرؔ ہر ایک سمت سے پتّھر لگا مُجھے

٭