عیاں عیاں یارو

روشنی ہے عیاں عیاں یارو

کون گُزرا کَشاں کَشاں یارو

آؤ جی بھر کے آج ہم رولیں

کیسی پابندیء فغاں یارو

اس چمن میں سبھی ہیں اہلِ زباں

پر نہیں کوئی ہم زباں یارو

جرأتِ عرضِ مُدّعا کی تھی

وہ نہ سمجھے مِری زُباں یارو

سُنتے ہیں جشنِ برق تھا کل رات

کیا ہوا میرا آشیاں یارو

ہم تو سمجھے تھے جل کے راکھ ہوا

دل سے شب بھر اٹھا دھواں یارو

وہ ہمیں میں تھا اور ہم اُسکو

ڈھونڈ آئے کہاں کہاں یارو

آسماں سے زمیں کیسے ملے

وہ کہاں اور میں کہاں یارو

حالِ اخگرؔ، پہ غور فرمائیں

اتنی فرصت انہیں کہاں یارو

٭