رنگ فروزاں نہیں رہا

رنگ نمایاں نہیں رہا

پلکوں پہ دل کا رنگ فروزاں نہیں رہا

اب ایک بھی دیا سرِ مژگاں نہیں رہا

قلبِ گداز و دیدہء تر تو ہے اپنے پاس

میں شاد ہوں کہ بے سروساماں نہیں رہا

آنکھوں میں جل اُٹھے ہیں دیئے انتظار کے

احساسِ ظلمتِ شبِ ہجراں نہیں رہا

تُجھ سے بچھڑ کے آج بھی زندہ تو ہُوں مگر

وہ ارتعاشِ تارِ رگِ جاں نہیں رہا

کیونکر نہ کُفرِ عشق پہ ایماں لائیے

سُنتے ہیں اب وہ دشمنِ ایماں نہیں رہا

اب آئے ہیں وہ پُرسِشِ احوال کے لیے

جب اعتبارِ عُمرِ گُریزاں نہیں رہا

ساکت ہُوا ہے جتنا تُجھے دیکھنے کے بعد

اتنا تو آئینہ کبھی حیراں نہیں رہا

امکانِ باریابیء دربارِ حُسن ہو

ہم کو دماغِ مِنّتِ درباں نہیں رہا

اخگرؔ وہ دن بھی دُور نہیں جب کہیں گے لوگ

محفل میں ایک اور غزل خواں نہیں رہا

* * *