مہر و مہ و انجم کے طلبگار نہیں ہیں

مہر و مہ و انجم کے طلبگار نہیں ہیں

ہم کہنہ چراغوں کے خریدار نہیں ہیں

مہر و مہ و انجم کے طلبگار نہیں ہیں

ہم کہنہ چراغوں کے خریدار نہیں ہیں

یہ بھی تری معصوم نگاہی کا اثر ہے

مجرم نظر آئے جو خطاوار نہیں ہیں

بے مأ یگیِ دل نے سکھایا یہ سلیقہ

خوں بار ہیں آنکھیں، جو گُہر بار نہیں ہیں

ہم کسبِ ہنر ہی میں ہنر بانٹ رہے ہیں

دریوزہ گرِ چشمِ خریدار نہیں ہیں

کیا باندھتے ہم برہمیِ زلف کے مضمون

اک جنبشِ ابرو کے سزاوار نہیں ہیں

گرویدہ و مشتاقِ خدوخال تو سب ہیں

سب تیری محبّت میں گرفتار نہیں ہیں

خوش فہمیِ آغازِ محبّت میں ہیں اخگرؔ

انجامِ محبّت سے خبردار نہیں ہیں

٭

ہم ان کو دیکھ کے حیرت میں آنے لگتے ہیں

وہ آرہے ہیں چمن میں بشوقِ پامالی

یہ بات ہے تو ابھی ہم ٹھکانے لگتے ہیں

ہم ان کو دیکھ کے حیرت میں آنے لگتے ہیں

اُنہیِں کو آئینہ گویا دکھانے لگتے ہیں

وہ جب بھی تیرِ نظر آزمانے لگتے ہیں

ہمار ا دل ہی نشانہ بنانے لگتے ہیں

وفُورِ درد نہیں باعثِ سکون مگر

کمی سے درد کی ہم تلملانے لگتے ہیں

ہم ان کی بزم سے اُٹھّے تو یوں لگے جیسے

غبار اڑ کے سرِ دشت جانے لگتے ہیں

نئے تو زخم بہت دل پہ آئے ہیں لیکن

نئے نئے بھی پرانے پرانے لگتے ہیں

وہ آرہے ہیں چمن میں بشوقِ پامالی

یہ بات ہے تو ابھی ہم ٹھکانے لگتے ہیں

بس ایک لمحۂ تنہائی چاہیے اخگرؔ

اب اس میں دیکھیے کتنے زمانے لگتے ہیں

٭

بن کے خوشبو وہ بسا ہے مجھ میں

کیجیے دار و رسن کی باتیں

جذبۂ صدق و صفا ہے مجھ میں

بن کے خوشبو وہ بسا ہے مجھ میں

ہر نفس موجِ صبا ہے مجھ میں

ہے تصوّر میں کوئی مست خرام

اک قیامت سی بپا ہے مجھ میں

سخت حیران ہے آئینۂ جاں

کوئی تو میرے سوا ہے مجھ میں

طاقتِ جنبشِ پا ہو کہ نہ ہو

ہمّتِ لغزشِ پا ہے مجھ میں

بختِ خفتہ کا یہ ہے ردِّ عمل

حوصلہ جاگ رہا ہے مجھ میں

کیجیے دار و رسن کی باتیں

جذبۂ صدق و صفا ہے مجھ میں

ظرفِ اظہارِ وفا سے بڑھ کر

جُراَتِ ترکِ وفا ہے مجھ میں

دل میں اک تیر ترازو ہوکر

درد کو تول رہا ہے مجھ میں

کوئی ارمان نہ نکلا اب تک

ایک میلہ سا لگا ہے مجھ میں

حسبِ ہر جبرِ مشیّت اخگرؔ

وصفِ تسلیم و رضا ہے مجھ میں

٭

سخت حیران ہے آئینۂ جاں

کوئی تو میرے سوا ہے مجھ میں