ایسے بھی لمحات آئے

مُحبّت میں ایسے بھی لمحات آئے

لہو ہوگیا دل مگر مُسکرائے

کچھ ایسی ادا سے مقابل وہ آئے

کئی بار اپنے قدم ڈگمگائے

ابھی وہ مِرے دل سے واقف نہیں ہیں

کوئی لاکے آئینہ اُن کو دکھائے

شبِ وعدہ یُوں دل کو سمجھا رہا ہوں

وہ آتے ہی ہوں گے وہ آئے وہ آئے

بہارو خزاں کو بیک وقت دیکھا

میں رویا ادھر وہ اُدھر مُسکرائے

وہ اِک لہر سَو¹⁰⁰ ناخداؤں سے بہتر

سفینہ جو طوفان سے ساحل پہ لائے

بلا سے یہ دل خاک ہوجائے لیکن

زبانِ محبّت پہ اُف تک نہ آئے

زبان سے مِری پہلے سُن لے کہانی

ضروری نہیں ہے تِرا نام آئے

میں وہ رہروِ راہِ الفت ہوں اخگرؔ

جو منزل پہ بھی اپنی منزل نہ پائے

٭

وفا شعار نہیں

وفا کو جو نہ سرا ہے وفا شعار نہیں

جو دل کا راز نہ جانے وہ راز دار نہیں

بہار میں ہوں تو اندیشہء خزاں ہے محیط

خزاں میں ہوں تو کچھ اندیشہء بہار نہیں

نفس کی آمد و شُد پر ہے انحصارِ حیات

نفس کی آمدوشُد کا ہی اعتبار نہیں

تِری عنایتِ پیہم کی آرزو ہے مگر

تِری جفائے مُسلسل بھی ناگوار نہیں

یہ کس مقام پر لے آئی بے خودی دل کی

کہ منتظر ہوں مگر کربِ انتظار نہیں

اُسے سُکون کا مفہوم ہی نہیں معلوم

جو دل کسی کی محبّت میں بے قرار نہیں

گُلوں کے لب پہ تبسُّم اگر نہیں اخگرؔ

تو یہ بہار کی توہین ہے بہار نہیں

٭

اپنا دل سمجھتے ہیں

شکستہ دل کسی کا ہو، ہم اپنا دل سمجھتے ہیں

تِرے غم میں زمانے بھر کے غم شامل سمجھتے ہیں

ہوئی ہیں اسقدر آسانیوں سے مشکلیں پیدا

ہر آسانی کو ہم اپنی جگہ مشکل سمجھتے ہیں

وہ خود دیکھے مگر اس کو کوئی نہ دیکھنے پائے

تِرا انداز ہم اے پردہء حائل سمجھتے ہیں

کسی کا ہاتھ زخموں پر، کِسی کا ہاتھ گردن میں

مسیحا کون ہے، اور کون ہے قاتل، سمجھتے ہیں

حدِ دل سے تو باہر درد تیرا ہو نہیں سکتا

جہاں تک درد ہے تیرا وہیں تک دل سمجھتے ہیں

مجالِ دید کی مُہلت نہ دیں لیکن یہ کیا کم ہے

وہ ہم کو اپنی بزمِ ناز کے قابل سمجھتے ہیں

تعیّن حُسنِ مقصد کا نہیں اُس کے سِوا کوئی

ٹھہر جائیں جہاں ہم بس اُسے منزل سمجھتے ہیں

کہاں تک ہم مُسلسل رُخ بدلتے جائیں کشتی کا

وہی طوفاں نکلتا ہے، جسے ساحل سمجھتے ہیں

انہیں فُرصت کہاں، یہ بھی غنیمت جانیے اخگرؔ

کہ وہ دل کو کسی تعزیر کے قابل سمجھتے ہیں

٭

مُجھ سے مُحبّت تو نہیں

آپ کو مُجھ سے مُحبّت تو نہیں

اس فسانے میں حقیقت تو نہیں

ہوس آلود ہے دامانِ وفا

یہ تجارت ہے مُحبّت تو نہیں

میں نے اس بُت کو خُدا مان لیا

بے بسی ہے یہ قناعت تو نہیں

اُن کی آنکھوں میں یہ آنسو کیسے

دل دُکھانا میری فطرت تو نہیں

صبر آجائے گا آتے آتے

دل کا جانا ہے قیامت تو نہیں

آئنے میں ہے فقط آپ کا عکس

آئنہ آپ کی صورت تو نہیں

نم ہوئیں کس لیے آنکھیں اخگرؔ

آرزو حرفِ ندامت تو نہیں

٭

سُوئے دار نکل جاتے ہیں

کم ہیں ایسے جو سُوئے دار نکل جاتے ہیں

بیشتر لوگ اُن آنکھوں سے بہل جاتے ہیں

اُن کو رکھتے ہیں کبھی دل میں کبھی آنکھوں میں

مے وہی رہتی ہے پیمانے بدل جاتے ہیں

کوئی نظروں سے جو گرجائے تو اٹھتا ہے کہاں

اشک تو پھر بھی سنبھالے سے سنبھل جاتے ہیں

رُخ ہواؤں کا بدلتے ہوئے دیکھیں جو ذرا

ناخداؤں کے ارادے بھی بدل جاتے ہیں

جب بھی اُس زلفِ پریشاں کی ہوا آتی ہے

لوگ خوشبو کی طرح گھر سے نکل جاتے ہیں

حسرتیں دل میں ہیں اتنی کہ نکلتی ہی نہیں

آج جاتے ہیں یہ مہمان نہ کل جاتے ہیں

اس کی شیرینیء لب کی جو کروں بات اخگرؔ

سارے الفاظ مِرے شہد میں ڈھل جاتے ہیں

٭

پلکوں پہ آرہے ہیں

پلکوں پہ آرہے ہیں

ہزار آنسو امنڈ امنڈ کر ہماری پلکوں پہ آرہے ہیں

کوئی تہی دامنوں سے کہدے کہ ہم خزانے لُٹا رہے ہیں

نہیں غم اِس کا کہ ہر نفس پر وہ لذّتِ غم بڑھارہے ہیں

ہمیں تو اس بات کی خوشی ہے کہ وہ ہمیں آزمارہے ہیں

نہ کوئی مونس نہ کوئی ہمدم نہ کوئ پُرسانِ غم ہے پھر بھی

نہ جانے کیوں دل یہ کہہ رہا ہے وہ آرہے ہیں وہ آرہے ہیں

طراوشِ خوں کی سُرخیوں سے یہ رات کی محفلیں سجی ہیں

مِرے لہو کے دیے جلا کر وہ جشنِ عشرت منارہے ہیں

نہ کوئی عالم نہ کوئی منظر، تھی ایک سکتے میں چشمِ حیرت

نقاب اُلٹ کر وہ آگئے ہیں تو آئنے گُنگُنا رہے ہیں

یہ کس نے چھیڑا ہے سازِ اُلفت کہ اب حیا سے کسی کے رُخ پر

ہزارہا رنگ آرہے ہیں، ہزارہا رنگ جارہے ہیں

چمن کو ہم چھوڑ آئے اخگرؔ ہیں اشک رنگیں تو چشم تر میں

برس رہی ہیں ہماری آنکھیں صلہ محبّت کا پارہے ہیں

٭

جستجو نوٹس:

طَراوِش [طَرا + وِش] (فارسی)

متغیّرات
تَراوِش [تَرا + وِش]

اسم کیفیت
ٹپکنے یا ٹپکانے کا عمل، بارش، ترشح، ہلکی بوندا باندی۔

معتبر جائیں گے ہم

معتبر جائیں گے ہم رُو برُو اس کے بچشمِ معتبر جائیں گے ہم آئنے میں دیکھنے آئینہ گر جائیں گے ہم اپنی ہستی کو جو تُجھ میں جذب کرجائینگے ہم بس ہمیں ہم ہوں گے نظروں میں جدھر جائیں گے ہم اب یہ سوچا ہے کہ جب بھی سامنے آئیں گے وہ سر جھکائے بے نیازانہ گذر جائیں گے ہم اِس طرف اک بُت کدہ ہے، اُس طرف بابِ حرم جائیں گے لیکن اِدھر ہوکراُدھر جائیں گے ہم مسندِ دارورسن کو بھی سجانا چاہیے اُٹھ کے محفِل سے تِری آخر کدھر جائینگے ہم موت سے پہلے اگرآنا تِرا مُمکن نہیں پھر یہی ہوگا کہ بس، بے موت مرجائیں گے ہم عشق کی فطرت ہے اپنی ذات میں مُشکل پسند کم ہوئی دشواریء منزل تو مرجائیں گے ہم اور بڑھ جائیں گی کُچھ حُسن کی وسعتیں آپ کی ہر ہر اَدا منظوم کرجائیں گے ہم وسعتِ پائے جنوں کا بھی ہے لازم احترام دشت سے فرصت ملے گی جب تو گھر جائیں گے ہم حاصلِ راہِ طلب ہے جستجو ہی جستجو مل گئی منزل تو اخگرؔ کوچ کرجائیں گے ہم ٭

مسکرائیں گے ہم

مسکرائیں گے ہم

سنگ برسیں گے اور مُسکرائیں گے ہم یوں بھی کُوئے ملامت میں جائیں گے ہم آئنہ تیرے غم کو دکھائیں گے ہم دل جلے گا مگر مُسکرائیں گے ہم غم تِرا اس طرح آزمائیں گے ہم ہر مُسرّت سے دامن بچائیں گے ہم اب یہ سوچا ہے اِک شخص کی یاد کو زندگی کی طرح بھُول جائیں گے ہم دیکھنا بن کے پروانہ آؤ گے تم صورتِ شمع خود کو جلائیں گے ہم دشمنوں پر اگر وقت کوئی پڑا دوستوں کی طرح پیش آئیں گے ہم دل کو زخموں سے اخگرؔ سجائے ہوئے روز جشنِ بہاراں منائیں گے ہم ٭