جُدا ہوتا ہے

جب کوئی مُجھ سے گلے مِل کے جُدا ہوتا ہے

ہر نفس میرے لیے ایک سزا ہوتا ہے

آدمی اپنی ہی صورت پہ فِدا ہوتا ہے

یہ بھی ایک عالمِ تسکینِ انا ہوتا ہے

آپ جب پُرسِشِ احوال کو آجاتے ہیں

درد کچھ اور سِوا اور سِوا ہوتا ہے

بات تو جب ہے کہ میخانے کی رُت بھی بدلے

صرف پیمانہ بدل دینے سے کیا ہوتا ہے

کس پریشاں کے لیے جائے گا خوشبو کا پیام

زُلف سے مشورۂ بادِ صبا ہوتا ہے

صرف آنسوہی جوابِ غمِ دوراں تو نہیں

اِک تبسُّم سے بھی یہ فرض ادا ہوتا ہے

دلِ پہ اِک چوٹ سی لگتی ہے ضرور اے اخگرؔ

شاخ سے جب بھی کوئی پھُول جُدا ہوتا ہے

٭

جستجو کا امتحاں ہوجائیے

یہ کلام حنیف اخگرؔ کی آواز میں سنیے

میرے ذوقِ جستجو کا امتحاں ہوجائیے

ذرّے ذرّے سے عیاں ہوکر نِہاں ہوجائیے

بے طلب آجائیے، اور جاوداں ہوجائیے

میرے پہلو میں بہارِ بے خزاں ہوجائیے

جب طبیعت کچھ حقیقت آشنا ہونے لگے

داستاں در داستاں در داستاں ہوجائیے

قابلِ اظہار ہوجائے اگر بے مائیگی

صورتِ شبنم گُلوں پر نوحہ خواں ہوجائیے

آئیے کچھ اس طرح نظریں جھُکا کر سامنے

آئینہ دارِ نگاہِ دوستاں ہوجائیے

وہ نظر تو دفعتاً اُٹھّے گی اخگرؔ ،پہلے آپ

قابلِ احسانِ مرگِ ناگہاں ہوجاِئیے

٭

صدا سے پہلے

بزم کو رنگِ سُخن میں نے دیا ہے اخگرؔ

لوگ چُپ چُپ تھے مِری طرزِ نوا سے پہلے

چونک اٹھتا ہے نفس کی بھی صدا سے پہلے

دل کا یہ حال نہ تھا عہدِ وفا سے پہلے

عشق کی لوَ طلبِ حسن کی محتاج نہیں

ہم نے چاہا ہے تجھے تیری ادا سے پہلے

دل طلب کرتی ہے جب ہم سے کوئی شوخ نظر

مشورہ کرتے ہیں ہم اپنی انا سے پہلے

یہ الگ بات کہ چُٹکی نہ مِرے دل کی کلی

ورنہ گلشن میں تم آئے تھے صبا سے پہلے

دستِ فطرت نے کوئی نقش بنایا ہی نہ تھا

خاک پر آپ کے نقش کفِ پا سے پہلے

صورتِ شمع جو بُجھتے تو ابد ہوجاتے

ہم کہاں تھے ترے دامن کی ہوا سے پہلے

میری اِک سادہ نگاہی کا اثر ہے ورنہ

کون واقف تھا تِرے رنگِ حیا سے پہلے

تیرا غم، دہر کا غم، عشق کا غم، اپنا غم

موت آئی ہے کئی بار قضا سے پہلے

بزم کو رنگِ سُخن میں نے دیا ہے اخگرؔ

لوگ چُپ چُپ تھے مِری طرزِ نوا سے پہلے

٭